每一場由愛情轉變而來嘅友情，都係源於放下。
有傾向同前度做返朋友嘅想法，大概都係傷得比較深嘅嗰一位啦！坦白講，一分手就即刻做返朋友真係好難，講得出：「我哋不如做番朋友可以嗎？」嘅人通常都係提出分手，同時又唔想做衰人嗰個。 其實做唔做得返朋友係咪真係咁緊要呢？假如你唔係因為暗坦心裏面想復合嘅話，我就覺得隨緣啦。
好多時做唔做得返朋友可以睇兩樣嘢。第一，兩個人分手嘅原因同過程。假如分手嘅時候搞到好核突，令雙方感情傷害更深，相信較難再次成為朋友；但兩個人如果係和平分手，就算係有一方做錯，但佢仍然坦白承認，有交帶嘅結局令做番朋友嘅機會比較高。第二，經過時間嘅洗禮，而家嘅前度已經≠過去嘅前度。可能佢比以前更好亦可能更差，又或者佢嘅觀念已經同你成為兩條平行線，就算你想同佢溝通都溝通唔到。幾年前，我喺街撞返我嘅初戀男朋友，然後大家都覺得作為初戀應該要保持聯絡。可惜，我哋最後發現大家都已經唔係中學認識嘅毛孩，亦由於各自嘅成長同生活背景相差太大，我哋完全溝通唔到，所以亦再無聯絡。
再者，朋友亦有好多種。建立友誼同保持友好係兩種唔同嘅關係。保持友好即係見到面會打招呼，生日會互相send個message，或者好間中grab coffee都其實好足夠亦好大方。至於需唔需要去到將彼此友誼放心間，要成日見面whatsapp，甚至會向前度呻一下現在嘅感情狀況，又未免過咗火位之餘，亦妨礙大家向前move on。大家曾經嘅關係比朋友更多，甚至親密如家人一樣，好難回到去最初噓寒問暖嘅純友誼。尤其身為前任女友嘅心情永遠係最矛盾，希望佢嘅新女友唔好太醜，但係正過自己心裏又不免有啲唔舒服...希望佢順利成家立室，然後又望望自己仍然係單身中女嘅話，送出去嘅祝福又少不免帶點酸味...笑....其實點做到真friend子啫?!
我都曾經講過，能否放下同要不要再連絡係兩碼事。已經放下，唔一定要再聯絡。可以再連絡，又唔見得已經放低，所以隨緣啦！
過去的人和事
就算難以重拾
回憶卻永不磨滅
即使不會再和你說話
沒有過去的經歷
就不會有今日的我
還是要說聲謝謝
共勉之。
#隨緣吧
#女人像鹽
Search